Misyon sa Reservists sa Pista Senyor milampos

Cebu - Gihulagway sa mga sakop sa 1st Cebu Ready Reserve Battalion sa Army Reserve Command nga malampuson ang ilang misyon isip crowd control sa kalihukan sa Pista Senyor kagahapon.

Ang mga nagbantay sa prosisyon ilabi na sa imahen sa Senyor Santo Niño ug sa Birhen sa Guadalupe mao ang mga reservists sa Philippine Army gikan sa 1st CRRB pinanguluhan ni Major Soliver Peras; 7th Regional Community Defense Group pinanguluhan ni Col. Normal Gomez ug sa 701st Community Defense Center pinanguluhan ni 2Lt. Sulpicio Ansao.

Ang maong mga reservists miporma og human cordon sa palibot sa mga imahen, hinuon walay mga debotong midumog atol sa prosisyon.

Sa laing bahin, usa ka 79-anyos nga deboto ni Senyor Santo Niño nagkanayon nga matag tuig gyud siyang moanhi sa dakbayan sa Sugbo aron lang motuman sa iyang panaad.

Matud ni Petra Galapando nga taga barangay Libho, lungsod sa Tabogon nga nagsugod siya og debosyon sa Senyor Santo Niño niadto pang tuig 1955 dihang ang iyang kamaguwangang anak nga si Fe Tampus kinsa nagpanuigon niadtong higayona og tres-anyos luyahon pa ug magsige lang og kakuyapan.

Gipangayo niya kang Senyor Santo Niño nga ayuhon ang balatian sa iyang anak ug gidungog ang mao niyang pag-ampo, sukad niadto nag-debosyon na siya sa patron.

Ang iyang anak 56-anyos na karon ug mao sad ang iyang kuyog kagahapon sa prosisyon.

Gibutyag ni Galapando nga samtang lig-on pa siya tumanon gyud niya ang iyang gipanaad kang Senyor Santo Niño bisan dunay mga higayon nga manghuwam lang siya og pamelite.

Apan sa karon nga matag duaw niya sa iyang debosyon magdala siya og mga kandila aron iyang mabaligya aron duna siya’y magamit sa pagpamalit og pagkaon ug mabayad sa iyang mautang nga plite.

Giangkon niyang kung itandi kaniadto gamay lang ang manguyog sa prosisyon ug aduna pay magbuling-buling nga mga bugoy sa manambong, apan karon nagbaha na sa mga tawo ang kadalanan. – BANAT NEWS