Fireworks display karong gabii sa CCSC

Cebu - Usa ka engrandeng fireworks display ang makita diha sa Cebu City Sports Center human sa Sinulog grand parade karong gabii sumala pa sa mga organizers sa Sinulog 2009.

Si Konsehal Nestor Archival, nga maoy gitahasan sa Sinulog Foundation pagpreparar sa nahisgutang presentasyon nagkanayon nga susama kaanindot sa milabay’ng Sinulog ang fireworks display karong gabii.

Ang fireworks display gigastuhan gihapon sa Sinulog Foundation og P300 mil ug giingong molungtad og 10 ngadto sa 15 minutos.

Sa susamang kalamboan laing fireworks display usab ang masaksihan sa mga Sugbuanon ug sa mga bisita karong gabii diha sa Ayala Center.

Kini gigastuhan og pribadong sponsors ug gipaabot nga mas bongga ug mas mabulukon itandi sa fireworks display diha sa Abellana.

Apan nakasiguro hinuon si Archival nga malingaw ang mga tawo sa ilang giandam subay usab sa ilang naobserbahan sa miaging tuig.

Samtang sa labing unang higayon usa usab ka fireworks display competition ang gipahigayon kagabii diha sa SM City Cebu.

Labing minos pito ka mga participants ang giingong nagpanindutay sa ilang fireworks display agi’g pahaom usab sa kasaulugan sa Pista Señor.

Matud sa staff ni Archival nga si Vincent Mangle, nga dunay premyo usab nga nagpaabot niadtong makadaog sa maong indigay. – BANAT NEWS