Nalunod tungod sa kwitis

Cebu - Gumikan sa pagpunay og pabuto sa kuwitis, usa ka pumpboat nga puno sa mga sakay nga mga tawo sa fluvial procession kagahapon ang nalunod human nitiurok ang kwitis ug diha mobuto sa luwan niini nga nakaparatol sa mga tawo.

Ang pumpboat nga “Kenneth and Kyle” nga nalunod giingon ni Gunio nga gisakyan sa labing minos 45 ka mga tawo lakip na sa kabataan, apan ang nakarehistro diha sa ilang buhatan nga pangalan sa pumpboat “Filipino Dream” ug duna lay sakay nga 15 ka mga tawo.

Ang aksidente nahitabo diha sa tunga-tungang bahin sa una ug ikaduhang taytayan nga nagdugtong sa dakbayan sa Lapulapu ug Mandaue.

 Ang station commander sa Cebu Coast Guard nga si Elpidio Gunio mitug-an nga gilingla sila sa tag-iya sa maong pumpboat nga usa ka paglapas sa mga lagda sa fluvial procession.

Dugang kalapasan mao ang pagdala og pabuto sa maong pumpboat nga nasabutan nang di himuon atol sa fluvial procession.

Usa sa nakasakay sa Kenneth and Kyle nga si Teresa Lupian nagkurog nga niasoy sa Banat News sa iyang kasinatian human ma-rescue.

“Duna man guy nagpabuto og kwitis sa among kauban unya didto ra pud niigo sa among gisakyan mao nga nanglukso ang uban,” sumala ni Lupian hinuon silang tanan nagsuot na og lifejackets ug naluwas dayon sa mga marshals sa Coast Guard.

Si Gerry Yconan taga Olango Island sa dakbayan sa Lapulapu ug kapitan sa maong pumpboat nga nahinabi sa mga tigbalita mibutyag nga kapin sa 40 ka mga tawo ang sakay sa iyang pumpboat.

Matud pa niya, nga samtang nag-aginod na siya nga nagsunod sa ubang pumpboat dihang usa sa iyang mga sakay nga lalaki ang nagpabuto og kuwitis apan mitiurok kini ug mibuto diha sa kasko.

“Nasalipdan man gud to sila tungod sa kadaghan ba sa sakay unya ako bitaw to gibadlong pero wala mopatuo,” matud ni Yconan kinsa nagdudang ang mga lalaking hubog nga nagdala og beer maoy sad-an.

Ang pagbuto nakapaliki sa kilid sa pumpboat hinungdan nga misulod ang tubig ug ang mga sakay nga nangaratol nakadugang sa problema maong natikwang ang maong bangka.

Si Gunio nagkanayon nga ilang isyuhan og Maritime Violation Receipt ang kapitan sa maong pumpboat ug kini ilang iduso ngadto sa Maritime Industry Authority (Marina).

“Yan ang aming gagawin while patuloy pa ang aming investigation sa nangyari, buti na lang hindi sa ating Santo Niño tumama ang firecracker,” sumala ni Gunio.

Kahinumduman nga niadtong miaging tuig, usa usab ka pumpboat ang nalunod atol sa fluvial procession tungod gihapon sa kwitis nga mikagar.

Sumala pa ni Yconan nga giabangan ang iyang pumpboat og P8 mil sa taga Pasil ning dakbayan sa Sugbu ug mao sad ang nagparehistro sa Marina nga makaapil sa fluvial procession apan bayad palang sa krudo sa iyang motorbanca ang iyang nadawat.

Gihimakak usab ni Yconan nga overloaded ang iyang motorbanca niadtong higayona sanglit mokarga kini og dili mominos 70 ngadto sa 80 ka mga tawo ug iyang paabangan sa mga turistang mag-island hopping. – BANAT NEWS