Hinabang sa 'gibanlas' nahatag na sa Probinsya

CEBU - Nadawat na ang mga hinabang alang sa mga apektadong pamilya sa lima sa pito ka mga lungsod nga dunay daghang mga panimalay ang nangaguba paghapak sa kusog nga bawod.

Gibutyag ni Wilson Ramos ang social welfare assistant sa Provincial Social Welfare and Development Office (PSWDO) sa Kapitolyo dihang nahinabi sa Banat News nga kagahapong adlawa gikuha na sa social welfare gikan sa lungsod sa Santander ug Malabuyoc ang mga hinabang pagkaon ug used clothings.

Gipadayag ni Ramos nga niadto pang Huwebes nahatag ang mga hinabang pagkaon gikan sa mga pamilyang biktima sa lungsod sa Dumanjug, Ginatilan, ug Samboan human kini maoy unang nakaduso og report sa mga kadaut.

Samtang sa paghimo ning balita ang hinabang mga pagkaon alang sa lungsod sa Madredijos sa isla sa Bantayan gipangitaan pa og paaging makatabok sa dagat tungod sa kusog nga hangin ug dagkong bawod sa dagat.

Matud ni Ramos molungtad lang hangtud sa tulo ka adlaw ang hinabang mga pagkaon nga giapod.

Ang matag pamilya makadawat og tulo ka kilong bugas humay, siyam ka lata nga sardines, unom ka noodles ug powder milk matag adlaw ingon man mga used clothings.

Mokabat na sa 35 ka sakong bugas humay ang gitagana sa Kapitolyo sa tanang apektadong pamilya sa maong mga lungsod ug ingon man 50 ka cartoon nga sardinas, pito ka kahon nga gatas ug mga used clothing.

Hinuon padayun karung nagmonitor ang PSWDO sa uban pang mga pamilya gikan sa kalungsoran nga naapektuhan niining pagdako sa bawod sa dagat nga moresulta sa pagpamanlas sa mga panimalay duol sa baybayon aron kini katabangan.

Kagahapong adlawa nakadawat na usab og laing report ang PSWDO kabahin sa pagkahunlak sa highway sa lungsod sa Barili nga giguba sa kusog nga bawod sa dagat ug naglisod kini nga kaagian sa mga sakyanan.

Nasayran usab nga 25 ka mga panimalay sa barangay Caubian sa Olango Island sa dakbayan sa Lapulapu ang nabanlas gihapon sa kusog nga bawod tungod sa haguros sa hangin, apan ning tungura di makatabang kanila ang Kapitolyo tungod kay di na kini sakop sa ilang hurisdiksyon.   (BANAT NEWS)