Barangay Kapitan nanion og armas

CEBU - Kapitan sa barangay Bulacao, dakbayan sa Talisay gipasanginlang nanion og pusil ngadto sa gwardiya sa usa ka subdivision sa nahisgutang barangay.

Si Margin Roxas, 48-anyos, residente sa maong barangay ug gwardiya diha sa Santa Catalina Subdivision sa pakighinabi niini sa Banat News mipasangil nga gitiunan siya og armas ni Kapitan Raul Cabañero niadtong Bag-ong Tuig apan wala niya kini masumbong sa kapolisan tungod kay mibiyahe man siya paingon ngadto sa Leyte.

Matud niini nag-roving siya diha sa subdivision nga iyang gibantayan ug anha gyud sila mag-agian sa Long Dream Villa Estelita Subdivision nga nasakop sa barangay sa maong kapitan.

Usa ka residente sa Villa Estelita nga naila lang sa ngalan nga “Valencia” nga giingong nakainom matud ni Roxas misaka sa ibabaw’ng bahin sa maong subdivision ug misita kung kinsa ang nagpabuto og whistle bomb.

Atol sa maong insidente ang anak sa tag-iya sa Long Dream nga si Mateo Laborte nag-inom uban sa mga higala ug mihimakak nga may nabati silang buto, ingon man si Roxas nga higala usab ni Laborte nga naatol nga miagi sa dapit.

Si Roxas miingon nga nakiglalis si Valencia kang Laborte ug giingong mibunot og pusil dayong panghagit og sumbagay hinungdan nga miduol si Roxas apan midagan si Valencia ngadto sa barangay hall.

Pag-abot ni Cabañero ug sa mga tanod miduol si Roxas sa pagtuong husayon silang duha ni Valencia apan gikatahong kalit siyang gitiunan sa kapitan og kalibre .45 pistola ug nagkanayon nga “duol kay piti ka!”

Gikatahong hasta ang mga tanod mibunot sad og armas,human sa maong insidente mibiya ang kapitan ug mga tanod diha sa lugar nga wala gani sila mahusay ni Valencia.

Si Cabañero sa iyang bahin, sa pakighinabi niini sa Banat News kagahapon sa buntag nakugang ug mihimakak sa maong pasangil.

Gibutyag niini nga .9mm pistol ang iyang service firearm nga gihatag ngadto kaniya sa gobiyerno.

Gihagit niya si Roxas nga moduso og pormal nga reklamo batok kaniya aron iyaha kining matubag sa tukmang lugar.

Ang kapitan ang natahap nga dunay kalambigitan sa politika ang maong pasangil, si Cabañero usa ka independente.

Matud niya nga nagkuyog siya sa mga tanod sa pagresponde og alarma kabahin sa insidente sa pagpamato diha sa Villa Estelita apan sa ilang pag-abot walay nakatudlo kinsay namato sa kabalayan.   (BANAT NEWS)