Cebu - Gatusan ka mga nagkadaiyang matang sa sakayan pangdagat ang gipaabot sa Philippine Coast Guard nga mokuyog sa fluvial procession sa imahen ni Sr. Sto. Niño karong tuiga nga manukad sa Ouano Wharf sa barangay Looc, dakbayan sa Mandaue hangtod sa Pier 1 sa dakbayan sa Sugbo.
Si Cebu Coast Guard Chief Petty Officer Virgilio Tibayan nga nahinabi sa Banat News kagahapon miingon nga hangtod niadtong Miyerkules sa hapon miabot na og 40 ka mga sakayan sa dagat ang nakaparehistro.
Kini naglangkob sa motorbanca, pumpboat, fishing boat, mga yati ug uban pa nga naggikan usab sa nagkadaiyang dapit dinhi sa lalawigan sa Sugbo ug mga silingang lalawigan nga naglakip na sa Bohol. Si Tibayan nagkanayon nga kutob na lang karong adlawa ang pagpangrehistro sa buot moapil sa fluvial procession.
Si Tibayan miingon nga ilang gihatagan sa nagkadaiyang guidelines ang mga tripulante nga nagdala sa maong sakyanan sa kadagatan atol unya sa ilang pagkuyog sa fluvial procession nga mapuno sa nagkadaiyang mga dayan-dayan nga maoy makahatag og dugang kamabulokon sa maong kalihukan.
Ang pagbutang og life jacket, pag-limit sa gidaghanon sa mga mosakay, pagsunod sa color coding ug ang paglumbay sa gisakopan niining division gimando nga sundon sa mga moapil sa prosesyon sa dagat.
Si Tibayan miingon nga si Cebu Coast Guard Commander Elpedio Gonio maoy mag-una sa pag-supervise sa fluvial procession. - Romeo Limpangog (BANAT NEWS)