Contingents nagpalista gamay ra

Cebu - Giangkon ni Sinulog Executive Director Ricky Ballesteros nga mas gamay ang mga contingents niining tuiga itandi sa Sinulog grand parade sa miaging tuig.

Nakasabot hinuon si Ballesteros niini tungod usab sa nasinating krisis sa nasod nga natagamtaman usab sa ubang kanasuran.

Gani miingon si Ballesteros nga dunay pipila ka mga mananaog sa Sinulog sa Kabataan sa Lalawigan ang dili makasalmot karong Domingo tungod usab sa kakuwang og sponsors.

Kini giingong naglakip sa Sogod Elementary School sa lungsod sa Sogod ingon man ang Guinsay National High School sa dakbayan sa Danao. 

Base sa talaan sa Sinulog Foundation, 39 lang ka contingents ang nagpalista karon alang sa Sinulog Based ug sa Free Interpretation Category.

Kini giingong naglakip na sa siyam ka mga out-of town contingents nga una nang mipadayag pagsalmot sa Sinulog 2009.

Kahinumduman nga moabot sa 50 ka contingents ang misalmot sa Sinulog grand parade sa miaging tuig sa duha ka kategoriya.

“For the past three years mosaka moubos man ang mga contingents pero karon it’s understandable kay krisis pero gamay ra kaayo na nga porsiyento,” sumala ni Ballesteros. - BANAT NEWS