Ex-Army mi-rape sa anak gipasakaan

Cebu - Gipasakaan og kasong three-counts of rape ug usa ka attempted rape ang usa kanhi sakop sa Philippine Army human milugos sa iyang kaugalingong 13 anyos nga anak nga usa ka grade 6 pupil.

Ang gipasakaan og kaso mao si Francisco Valiao, 45, minyo, kanhi miyembro sa Armed Forces of the Philippines ug lumad nga molupyo sa barangay Polo, lungsod sa Alcantara.

Segun pa sa reklamo sa minor de edad nga biktima nga nagsugod og lugos ang iyang amahan niadtong Agosto 28,2007 mga alas 10 sa gabii diha mismo sa sulod sa ilang panimalay, samtang natulog siya giduol siya sa suspetsado ug gipangutana kun si kinsa ang iyang gihigugma ug gitubag kini nga ang iyang inahan ug mga igsuon.

Ang suspetsadong amahan kalit nga mihulga nga patyon ang iyang inahan ug igsuon kun moalma sa iyang pagabuhaton. Ang suspetsado mihubo sa biktima sa tanan niining sapot ug gipanamastamasan ang pagkababaye niini.

Gisundan sa paglugos ang biktima sa adlaw sa kalagkalag, Nobiyembre 2, 2008 ug sa Enero 7, 2009.

Niadtong Enero 9 ning tuiga mga alas 4:30 ang takna sa hapon, ang biktima gikuha na mismo sa suspetsadong amahan didto sa iyang tunghaan ug gipasulod dayon sa kwarto ug gisirad-an ang tanang bintana ug pultahan ug nagpasipa sa tingog sa sound system.

Buot unta nga lugoson na usab ang anak, dihang ang 19 anyos nga igsuon sa biktima nga usa ka minyo nakalabay sa balay ug nagpakisusi tungod kay sirado man ang bintana ug pultahan. Dihang duol na kini sa balay iyang nadunggan nga nagpakiluoy ang biktima nga dili na lugoson pa.

Nagpatabang ang 19 anyos nga igsuon sa suod nga classmate sa biktima aron sangpiton kini ug tuod man napakgang ang linuog nga laraw sa amahan.

Nagpakitabang dayon ang biktima ngadto sa ilang barangay official ug sa kapolisan aron masikop ug mataral sa hukmanan ang amahan. - Chester Abadilla (BANAT NEWS)