Wa pay suspek nga gisikop: Pat

Cebu - Ang pangulo sa Task Force Osorio mi-insister nga wala silay gidakop nga suspetsado sa pagpusil-patay kang piskal Patrick Osorio niadtong miaging semana diha sa may dalan Gochan barangay Mambaling.

Kini maoy gipadayag ni Comendador human usab migawas sa pamantalaan nga nagbutyag nga adunay gidetiner nga nadakpang suspetsado nga usa ka Richman Alda nga taga barangay San Nicolas.

Matud pa ni Comendador nga dili kini tinuod gumikan kay si Alda dili suspetsado sa krimen gawas pa si Alda boluntaryong mitahan sa iyang kaugalingon aron pag-clear sa iyang pangalan sa dihang usa sa mga testigos mitudlo kaniya.

Apan nasuta nila sa imbestigasyon nga wala gyud kini kalambigitan sa krimen ug gani ang motorsiklo lang niini maoy gipabilin gumikan kay gikwestyon pa ang dokumento niini.

Giklaro niini nga siya lang maoy commander sa Task Force Osorio ug wala nay laing tawo nga mopagawas og statement labot sa maong kaso ug ang migawas nga balita wala maggikan kaniya.

Gipasabot niini nga Sabado pa nila gi-hold si Alda human gikatahong mi-text kini sa amigo niining witness nga ‘gisundan’ niya si piskal Osorio, apan sa dihang gipalawman ang imbestigasyon migawas nga komedya ra niini ang gi-text.

Si Comendador nagkanayon nga siguruhon nilang di ‘fall guy’ ang ilang dakpon kun kini gyud maoy suspek.

Si Alda gikatahong gipapauli na sa mga polis niadto pang Lunes sa alas dos sa hapon human kini ma-clear sa mga imbestigador.

Gani iyang giklaro nga dili lang si Alda maoy ilang giimbitar tungod kay daghan pa silang mga tawong gipang- imbitar.

Samtang gidala na kagahapong adlawa ang patay'ng lawas ni Osorio sa lungsod sa Dalaguete gikan gihaya og pipila ka adlaw diha sa iyang balay sa Deca Homes lungsod sa Minglanilla.

Ang amahan sa namatay nga piskal nga si Atty. Jesus Osorio Sr. nagkanayon nga ang lubong sa iyang anak ipahigayon karong Sabado sa sam-ang sa lungsod sa Dalaguete.

Ang buhatan ni City Prosecutor Nicolas Sellon mipahibalong may matunol silang financial assistance sa pamilyang Osorio gikan sa kauban nilang mga piskal dinhi sa Sugbu ug sa tibuok rehiyon siyete ug ingon man ang hinabang financial gikan sa Department of Justice kon DOJ. – BANAT NEWS