Puya gisulod og garapon

CEBU - Usa ka lima ka buwan nga puya napalgan sa usa ka bata sulod sa Chinese Cemetery, sa MJ Cuenco Avenue,. Barangay Carreta ning dakbayan kagahapon sa alas 8:00 sa buntag.

Si Stephen Solon, 9 anyos, usa ka nagtungha sa Grade 1, nga taga Carreta mibutyag sa kapolisan nga nagduwaduwa siya niadtong higayona kauban sa iyang mga higala didto sulod sa menteryohan.

Midugang ang bata nga sa tanto nilang duwaduwa nasiplatan niya ang duha ka mga plastic nga gitabonan og yuta.

Gumikan sa iyang pagkakuryoso, si Solon natintal sa paglili sa maong mga plastic bag diin nakita niya ang usa ka dakong garapon nga gisudlan sa puya.

Iya dayong gisumbong ngadto kang konsehal Rey Francis sa Carreta nga maoy mihatod sa maong puya ngadto sa kapolisan.(Orven Nayon UV-Journalism Intern)   (BANAT NEWS)