Krimen mosaka sa probinsiya

Cebu - Gipaabot sa kapolisan sa probinsiya sa Sugbu mosaka ang gidaghanon sa mga krimen sa kalungsuran karong tuiga tungod sa krisis.

Sumala pa ni Cebu Provincial Police Office director, Sr. Supt. Carmelo Valmoria sa command conference sa tanang mga hepe sa kapolisan sa kalungsuran diha sa capitol social hall dunay posibilidad nga ang krisis maoy magtukmod sa mga tawo pagbuhat og krimen.

Matud pa ni Valmoria nga ang maong pangagpas gibase niya sa krisis sa nasud sa Estados Unidos nga hinayhinay nang nakaapektar dinhi Pilipinas.

Si Valmoria nipasabot nga usa sa hinungdan niini mao unya ang pagpanaktak og mga trabahante sa ubang mga kompanya ug mapugos pagkuyog sa mga grupong nalambigit sa mga krimen gumikan sa kawad-on.

Tungod niini, gipahimangnuan ni Valmoria ang tanang kapolisan nga kanunay magmaabtikon ug andam nga motubag sa bisan unsang alarma ug makig-alayon sa mga local nga kagamhanan. – BANAT NEWS