Piskal mikurog sa kahadlok

Cebu - Ang pagbanhig patay sa ilang kauban nakamugna og kahadlok sa mga sakop sa City Prosecutors Office ug nanawagan sa mga awtoridad sa pagpangita og pamaagi pagsulbad sa kaso ug di na masubli ang susamang hitabo sa ilang grupo.

Matud pa ni City Prosecutor Nicolas Sellon sa pakighinabi sa Banat News nga di kalikayan nga bation sila og kabalaka ug kahadlok kung ingon niining hasta ang mga tigpatuman sa hustisya targeton na sa mga kriminal.

Kini maoy iyang pamahayag human sa pagbanhig patay kang Assistant City Prosecutor Patrick Ian Osorio diha sa barangay Mambaling niadtong Martes sa hapon.

Nunot niini gihagit ni Sellon ang kapulisan pagdoble sa ilang paningkamot nga mahimong luwas ang palibot gikan sa mga kriminal.

Suportado ni Sellon ang pagkondinar sa Integrated Bar of the Philippines (IBP-Cebu Chapter) sa mga suspetsado nga responsable sa pagpamusil patay kang Osorio.

Nunot niini niapilar si Sellon ilabina sa mga kauban nilang mga abogado nga unta pasabton ang mga kliyente niini ilabina kadtong dili makapabor sa ipakanaug nilang desisyon sa mga resolusyon sa kaso nga dili kumkomon ang kamot sa balaud tungod kay mahimo paman kining maka-apilar sa ilang ipakanaug nga desisyon.

Nasayran nga dad-on na karung adlawa didto sa ilang lungsod sa Dalaguete ang patay’ng lawas ni Osorio nga kasamtangan karung gihaya sa Sacred Heart Center ug ang lubong niini unya sa petsa 17 didto sa maong lungsod. – BANAT NEWS