Cebu - Diriyot kan-a sa kalayo niadtong Biyernes sa hapon ang balay alampoanan ni Mayor Socrates Fernandez diha sa Vista Grande Subdivision, barangay Bulacao, dakbayan sa Talisay human misilaob ang mga sagbot diha sa duol nga bakanteng luna.
Si FO2 Joel Pardillo sa pakighinabi niini sa Banat News kagahapon sa hapon mibutyag nga base sa imbestigasyon ni SFO2 Eulogio Abellar nga adunay nalibang diha sa kalibunan duol sa balay alampoanan ug nanigarilyo.
Ang upos sa sigarilyo gilabay sa maong tawo ug tungod sa kauga sa mga sagbot misilaob kini sa tibuok palibot ug gilamoy ang tunga sa ektaryang kalibunan.
Gibana-banang 10 metros nalang ang gilay-on sa kalayo gikan sa balay alampoanan sa mayor dihang naabtan sa mga bombero ug napasiritan og tubig.
Usa ka residente sa lugar maoy daling mitawag diha sa ilang buhatan hinungdan nga mipadala sila og upat ka firetrucks ug napawong kini human sa 10-minutos.
Gikatahong wala diha ang mayor atol sa pagkahitabo. - Brenda Batuto (BANAT NEWS)