Gun ban sa palibot sa Mardi Gras ipatuman

Cebu - Gisugyot sa pangulo sa Cebu City Police Office Sr. Supt. Patrocinio Comendador ngadto sa buhatan sa Police Regional Office (PRO-7) nga ipatuman ang gun ban duol sa carrousel route atol sa Sinulog Grand Mardi Gras karong petsa 18 ning buwana.

Kini isip kabahin sa kaluwasan sa publiko nga giandam sa Task Force Sinulog 2009 ug kini maglangkob sa sulod sa Cebu City Sports Center diin magdasok ang mga dancers, mga bisita ingon man mga opisyal.

Gipadayag niini nga kadto lang mga polis nga nadestino sa nahisgutang area ang makahupot sa armas, samtang kadtong mga polis nga wala madestino sa area gikinahanglang magpakita og dokumento sa armas.

Giawhag usab niini ang mga pribadong tawo nga adunay armas, ingon man permit to carry firearms nga dili gyud magdala niini atol sa ilang pagtan-aw sa Sinulog Grand Mardi Gras.

Samtang subay niini iyang gipahibalo nga doblehon nila sa pagbutang og mga personnel diha sa may Day-as, B. Rodriguez, ug Baseline area nga sagad estambayan sa mga gangs. - Guam Logroño (BANAT NEWS)