Rape, murder Suspek gipusil patay

Cebu - Namatay diha-diha ang usa ka mag-uumang pinangita sa balaud human kini pusila sa wala mailhing lalaki diha sa barangay Mag-atobang, lungsod sa Tuburan, ala-1:00 sa kaadlawon sa miaging adlaw.

Ang biktima giilang si Ricolito Pepito, 27, taga barangay Cabangcalan sa nahisgutang lungsod kinsa nakaangkon og samad pinusilan diha sa iyang mata gikan sa wala matinong kalibre sa armas.

Si PO1 Junyl Ater sa Tuburan Police Station mibutyag sa Banat News nga ang biktima mitan-aw sa usa ka beauty pageant sa ilang barangay ug sa dihang pagpauli niya kauban sa iyang manghod nga babaye, gibanhigan kini.

Nasayran usab base sa rekord sa kapolisan nga ang biktima adunay pending nga kaso sa pagpanglugos ug murder sa Regional Trial Court (RTC) branch 29 sa dakbayan sa Toledo ug padayon pang gihusay. Matud pang Ater si Pepito makadaghan nang higayon nga gipasanginlan sa mga pagpamatay diha sa ilang lugar ug nagtuo ang kapolisan nga posibleng may kalambigitan sa mga nakaaway niini ang motibo sa krimen. - Guamittos Logroño ug Rica Calinawan (BANAT NEWS)