Cebu - Patay na’ng nakit-an ug dunay tulo ka samad dinunggaban sa dughan ang usa ka 90 anyos nga Polish national sulod sa iyang pinuy-anan didto sa Centro Liboron siyudad sa Carcar kagahapon sa alas 12:25 sa kaadlawon.
Ang namatay giila nga si Antonio Henrecus Luvke, 90 anyos, usa ka balo ug lumad nga taga Poland apan kasamtangang nagpuyo sa maong lugar.
Matud ni PO3 Reynaldo Fuentes sa Carcar City Police Station sa dihang nahinabi sa Banat News subay sa blotter nga gibasehan niini ang pag-umangkon sa asawa sa biktima nga si Micheal Cabunkal ug caretaker sa maong langyaw maoy mipahibawo sa kapolisan human ilang nadiskitaan ang si Luvke patay na sulod sa iyang lawak.
Sa pagresponde nila ni SPO3 Jonas Panaganan nasuta nga nagkatag na ang mga butang apil na ang mga sapot ug mga unlan sulod sa lawak sa biktima nga nagpakita nga dunay ‘struggle’ nga nahitabo.
Nasuta nga dunay tulo ka mga samad dinunggaban sa sentro sa dughan ang biktima nga maoy hinungdan sa hinanali niining kamatayon.
Hinuon diha pa sa iyang lawak ang kwarta niini nga P7 mil ug uban pang mahalong butang gawas lang sa ATM card niini nga nahanaw.
Giapil karon og susi sa nagpadayong imbestigasiyon sa kapolisan nga posibleng tulis ang motibo sa krimen human mawala ang ATM card niini ug nahanaw usab ang laing caretaker niini nga si Cecil Pobrero nga maoy gitahasan sa pag-withdraw sa kwarta sa maong langyaw tungod kay maglisod na man kini sa paglakaw tungod sa katigulang na niini.
Nasayran nga namatay na usab ang kapuyo ni Luvke nga si Florie Cabangcal nga usa ka Cebuana. – BANAT NEWS