Tubig sa Talisay ipasusi sa mga Kapitan

Cebu - Si konsehal Shirley Belleza sa Talisay City miawhag sa tanang kapitan sa barangay sa maong dakbayan nga sutaon kun ang tubig sa ilang atabay o poso artesiano limpyo ba aron kalikayan ang kadaot sa panglawas sa ilang mga konstituwente.

 Si Belleza, tsirman sa komitiba sa panglawas mihimo sa maong pasidaan human mahiagom sa suka- kalibang ang ubay-ubay nga molupyo sa dakbayan sa Talisay niadtong miaging adlaw.

Atubangan sa mga miyembro sa Association of Barangay Captains (ABC) kinsa nagtagbo kagahapon, si Belleza nagkanayon nga daan na niyang gipasidan-an ang maong mga kapitan niadto pang miaging tuig.

Si Belleza sa pakighinabi niini sa Banat News nagkanayon nga adunay mga poso artesiano ug atabay sa pipila ka barangay sa maong dakbayan nga kontaminado tungod kay may mga pansayang gitukod sa palibot niini.

Alang kang Belleza, peligro kaayo kining sistemaha sanglit ang mga duga sa hugaw sa tawo gikan sa pansayan dako kaayo og posibilidad nga motuhop kini hangtod ngadto sa tinubdan sa tubig nga anaa sa atabay o kaha poso artesiano.

Miingon si Belleza nga kun dili magtagad ang mga molupyo niini, kinahanglang ang mga opisyal sa barangay maoy mosanta ug mobadlong sa mga molupyo sa paggamit sa maong tubig aron kalikayan ang kadaot sa ilang panglawas. – BANAT NEWS