'Local Boys' nga gun-for hire ang mga 'suspek'

Cebu - Dako ang pagduda sa Task Force Osorio nga mga ‘local boys’ ra ang mi-ambush kang piskal Patrick Osorio niadtong niaging Martes sa hapon diha may Gochan St., barangay Mambaling.

Kini maoy gitataw ni Sr. Supt. Patrocinio Comendador ang Task Force Osorio Commanders, subay sa impormasyon ug duna na kini mga pangalan sa duha.

Si Comendador nagkanayon nga ang pangalan sa duha nigawas atol sa ilang imbestigasyon ug sa pagkakaron ilaha nang gisubay ang backgrounds sa duruha.

Matud pa niini nga ang usa niini dunay kaso nga murder dinhi sa dakbayan apan di pa gyud nila sigurado kung mao ba gyud kini kay anaa pa sila sa process sa pag-eliminate sa mga suspetsado nga gun-for-hire dinhi.

Apan giklaro niya nga sa ilang pagduda dili konektado sa ilang kaso ang pagpatay sa maong piskal kundili dunay tawong posibleng maoy mikuha sa ilang serbisyo.

Nagtoo usab siya nga ang duha wala pa makagawas sa Sugbu.

Ang kabahin sa motibo sa pagpatay sumala pa niini nga dili nila masalikway nga work-related kini apan wala usab nila tangtanga ang posibilidad nga may laing hinungdan ang pagpapatay kaniya.

Subay niini mi-coordinate na sila sa pamilya sa piskal ug gani niadtong adlaw nga namatay kini ni-request gilayon sila sa pagpa-autopsy sa patay’ng lawas niini.

Kagahapon gipakita ni Comendador ang usa ka full metal jacket nga bala nga nakuha sa crime scene nga wala moigo sa lawas sa piskal ug igo rang mibanda sa bukton niini.

Gipasabot niini nga kun ugaling ang bala nga gigamit specialized sama sa glacier ammunition sa .45 aduna kini 300 ka mga gagmay’ng bolitas nga mokatag sa lawas sa usa ka tawo inig kaigo niini.

Subay niini nagpadayon usab sila sa pagpangitag dugang ebidensya ingon man pagkuhag dugang impormasyon gikan sa mga saksi nga didto sa crime scene.

Kagahapong adlawa ang mga abogado sa kapulisan nga gilangkuban nilang captain Christopher Ruiz, SPO4 Julius Ompad ug Henry Biñas hepe sa Talisay City Police Office gi-imbitar nila sa case conference.

Matud pa ni Sr. Insp. Mario Monilar hepe sa Homicide Section ang tulo dako og matabang pagpangita og mga ideya ug panahom alang sa kasulbaran sa maong kaso.

Samtang ang National Bureau of Investigation mibutyag nga duna silay dugang duha ka mga testigos nga gituuhan nilang makahinay-hinay pag-ila sa nagpusil-patay ni Osorio.

Sumala pa ni NBI agent Renan Oliva nga ang pinakabag-ong testigos nga ilang nakuha mao usa ka mekaniko nga pipila lamang ka metros gikan sa lugar diin gibanhigan si Osorio.

Apan gitataw ni Oliva nga wala gihapon kini makatarong sa paghulagway sa mamumuno ni piskal Osorio tungod kay nakasul-ob kini og full face helmet.

Gawas sa maong testigos may nakuha usab silang laing testigo nga usa ka traysikad driver ug usa ka traffic enforcer nga ila usab nga gipauslan sa mga imbestigador sa Criminial Intelligence and Investigation Branch.

Ang CIIB sa Cebu City Police Office duna nay laing duha ka mga testigos.

Ang katuyuan sa pagtugyan sa ilang nakuhang testigos ngadto sa CCPO aron makakab-ot usab sila og hiniusang resulta sa imbestigasyon. – BANAT NEWS