500 police trainees pabantayon sa Sinulog

Cebu - Kapin sa 500 ka mga Field Training Program (FTP) nga bag-ong recruit sa Police Regional Office (PRO-7) ang moabag sa kapulisan sa dakbayan sa Sugbu atol sa Sinulog Grand Mardi Gras karong petsa 18.

Kini maoy gibutyag ni Sr. Supt. Patrocinio Comendador ang hepe sa kapulisan sa dakbayan sa Sugbu kinsa mao usay commander sa Task Force Sinulog 2009.

Si Comendador mitataw nga ilang gi-maximize ang tanan niyang mga personnel sa CCPO sa maong kalihukan.

Walay gitugutang maka-leave sa iyang mga sakop gumikan kay gitinguha niini nga bisan tuod dunay mga gi-deploy sa kadalanan kinahanglang magpabiling normal gihapon ang duty sa mga police.

Sumala pa niini nga gawas sa ubang mga sector, sa Central Command kinsa maoy tahasan sa crowd control, dako sad kaayo’g ikatabang sa CCPO ang kapin sa 500 ka FTP gikan sa Regional Training School.

Gitataw niini nga nahan-ay na nila ang preparasyon sa seguridad sa Sinulog, ug gani silang duha ni PRO-7 Chief Supt. Ronal Roderos kinsa mao usab ang overall supervisor sa Task Force Sinulog ang mangunay pagsuroy sa ilang mga sakop.  – BANAT NEWS