Natagak o gituyo og tagak?

Cebu - Gisusi sa kapolisan ang kamatayon sa usa ka tawo nga gikareport nga nahagbong sa kanal ug namatay tungod sa impormasyong nadawat nga atol sa pagkahagbong niini nakalitok pa kini og pangalan sa posibleng suspek nga maoy nitagak kaniya sa maong kanal diha sa barangay Mantuyong sa dakbayan sa Mandaue.

Si PO3 June Tago nga nahinabi sa Banat News miila sa namatay nga mao si Sacarias Perez, 40, nagpuyo sa maong dapit.

Matud pa ni Tago nga ilang nasayran gikan sa pipila ka mga lumolupyo nga daw gituyo paghagbong ang biktima aron mamatay.

 Giugkat sa mga silingan ang biktima ug gidala sa Mandaue City District Hospital apan gideklarar kini sa mga doktor nga dead on arrival.

Gitug-an ni Tago nga sa pagkakaron wala pa mokooperar og maayo ang pamilya nga nakaingon sa kalangan usab sa imbestigasyon nga ilang gihimo.

Subay sa mga nahipos nga kasayuran gikan sa mga silingan nga ang biktima nianang gabii sa pagkahitabo nakabati sila niining misinggit og “ayaw siyot!” pipila ka takna una pa kini makaplagi sa maong imburnal.

Matud pa ni PO3 Tago nga may usa ka tawong ginganlan og “Isyot” sa maong dapit apan hangtud nga di mokooperar ang pamilya sa biktima di sila makapadayon sa kaso. – BANAT NEWS