'Pusher' nakaipsot tungod sa spy cam

Cebu - Gumikan sa spy camera nga gimuntar sa iyang balay usa ka gipasanginlang drug pusher ang nakaeskapo apan duha niya ka mga sakop nga giingong nag-repack og shabu nasikop sa milabay’ng hapon sa sitio Saac barangay Buaya dakbayan sa Lapulapu.

Ang nasikop mao sila si Carlo Abing, 25 ug Jovannie Camatso, 19, pulos mga residente sa maong dapit apan nakaipsot si Rogelito Amistad alyas Wax, 40.

Matud pa ni SPO2 Rex Cabrera sa operation section sa kapolisan sa Lapulapu nasayran nga si Amistad mao unta ang ilang tumong sa pagpahigayon sa buybust operation sa maong dapit apan nakaikyas kini.

Atol sa pagkasikop sa duha nakita sa kapolisan ang 14 ka gagmay’ng pakete sa gituuhang shabu nga gi-repack nila ni Abing ug Camatso lakip na ang mga kagamitan sa pagsuyop niini.

Nasuta usab sa kapolisan nga adunay surveillance camera si Amistad hinungdan sa dali kining nakaipsot, ang camera gibutang sa usa ka payag nga makita ang tibuok hawanan atubangan sa iyang panimalay nga makita sa monitor diha sa suyopanan.

Giandam na ang kasong kalapasan sa RA 9165 ubos sa sec. 11 & 12 Art. II uban sa duha ka mga dinakpan ug sa mga ebidensiya nga ila nang gisumiter ngadto sa PNP Crime Laboratory.  – BANAT NEWS