Akrho moapil sa street dancing

Cebu - Sa labing unang higayon mosalmot ang Alpha Kappa Rho Fraternity sa Sinulog 2009 Street Dancing competition partikular na sa Sinulog Free Interpretation Category.

Kini maoy gipahibawo sa national president sa nahisgutang fraternity nga si Richard Buscayno kinsa nangayo na og pagtugot kang acting mayor Michael Rama.

Matud ni Buscayno nga subsob ang gihimo karong pagbansay-bansay sa iyang mga sakop alang sa umaabot nga Sinulog festival nga langkuban sa 80 ka mga miyembro nga pagatawgong Tribu-Akrho.

Ang konsepto sa contingent sa maong fraternity gikuha gikan sa langyaw’ng pelikula nga “The Apocalypse.”

Gisalikway sa presidente sa Akrho ang gikabalak-an sa uban nga magubot ang Sinulog kung mosalmot ang ilang fraternity tungod kay mao na kini ang ika-unom ka tuig sa ilang pag-apil sa Sinulog nga malinawon.

Gitataw sa presidente sa Akrho nga ang tumong sa ilang pagsalmot mao ang pagpakita sa ilang debosyon kang Senior Santo Niño.

“We will join the Sinulog para sa devotion namo sa Santo Niño and not for anything else…at least, naka-focus yung members namin sa Sinulog,” nagkanayon si Buscayno.

 Sumala ni Buscayno nga gawas sa dancing contingent, sila moapil gihapon sa Float ug Puppeteers Category.

Wala hinooy nakitang problema si Rama sa tinguha sa Akrho kung kini makatuman sa guidelines nga gilatid sa Sinulog Foundation.

 Ingon usab niini ang gipadayag ni Konsehal Augustus Pe Jr., nga maoy chairman sa Committee on Public Order and Safety sa City Council.

 Niingon si Pe nga aron pagsiguro nga walay kagubot nga motumaw dunay mga polis nga pakuyugon sa contingent sa Akrho. – BANAT NEWS