Mga piskal nag-armas na

Cebu - Human gipusil patay sa duha ka wala hiilhing mamumuno si assistant city prosecutor Patrick Ian Osorio, ang tanang mga miyembro sa City Prosecutor Office armasan na karon.

Sumala pa ni City Prosecutor Nicolas Sellon nga ang mga piskal karon makadala-dala na sa ilang tagsa-tagsa ka armas aron makapanalipod sa ilang kaugalingon.

Ang Department of Justice kon DOJ naningkamot nga maisyuhan og permit to carry firearms ang tanang mga prosecutors dinhi sa Sugbu ug sa ubang bahin sa nasud.

Si Sellon nagkanayon pipila lang sa iyang mga miyembro ang nagtinil og armas apan sa nahitabo ni Osorio ang wala magdala-dala og armas nag-apply na karon og permiso aron makabaton niini.

Samtang si Cebu City Police Office Deputy director for operation, Supt. Paul Labra II nibisita sa buhatan ni Sellon aron pagkuha sa mga kopya mga sa kasong gitutukan ni Osorio sa wala pa kini patya.

Sumala pang Labra nga sagad sa maong mga kasong giatiman sa namatay nga piskal mao ang kasong may kalambitan sa illegal nga drugas.

Sa laing bahin, seryoso ang Integrated Bar of the Philippines Cebu City Chapter sa sugyot nga did-an na ang mga motorista sa pagsul-ob og full- face helmets.

Si Alex Tolentino, kanhi presidente sa IBP Cebu Chapter niingon nga ilang awhagon ang Cebu City Council nga mopalabang og ordinansa nga magdili na sa mga motorista sa paggamit sa full-face helmets aron nga malikayan ang pagdaghan sa krimen nga naglambigit sa mga nagmotorsikong mga criminal nga magsuot niini ug mas daling pag-ila kanila.

Kahinumduman nga nagkadaghan na ang mga kasong pagpamusil- patay nga binuhatan sa nagmotorsiklong magsul-ob og full-face crash helmets, sagad kanila wala gyud mailhi.

Matud pa ni Tolentino nga lisod kaayo alang sa mga saksi ang pagtumbok sa mga kriminal kun magsul-ob kini og tabon sa nawong sama sa helmet ug bisan na ang kapolisan sa ilang imbestigasyon.