Kap gikiha sa SK chair

Cebu - Gipasakaan og kasong kriminal sa SK chairman sa barangay ang mga barangay official sa Punta Princesa ning dakbayan sa Sugbu kagahapong adlawa ngadto sa Visayas Ombudsman.

Ang mipasaka og kaso batok sa mga opisyal sa nahisgutang barangay mao mismo ang ilang Sangguniang Kabataan (SK) chairman nga si Rey Aldo Porcadilla.

Matud sa affidavit ni Porcadilla nga gigamit sa programa sa ilang barangay ang pundo sa SK nga walay pagtugot sa ilang kapunungan.

Kini pinaagi usab sa pagpamalit og nagkadaiyang mga school supplies alang sa Brigada Eskwela Program sa miaging tuig nga mokantidad og kapin sa P240 mil.

Nagkanayon si Porcadilla sa iyang reklamo nga ilegal ang gihimo sa konseho sa ilang barangay tungod kay ang ilang SK funds alang ra sa ilang mga proyekto.

Sumala sa SK chairman nga usa ka kalapasan sa Article 220 sa Revised Penal Code ang nahimo sa mga opisyal sa ilang barangay hinungdan nga iyang gisang-at ang reklamo.

Sa iyang bahin gikataw-an lang ni Kapitan Rodulfo Diorico ang kaso nga gipasaka sa ilang SK chairman.

Nagdumili hinuon pagkomento ang kapitan sa maong kaso kung kini may kalambigitan ba sa politika, hangtod nga siya makadawat og kopya sa reklamo.

Lakip sa gikiha ni Porcadilla mao ang mga kagawad sa barangay nga sila si Rey Gabriel Salgado, Galileo Lauron, Eleno Andales Jr., Manilyn Mar-Mier, Marie Ann Maravilles ug Emilio Tabar.

Bugtong si kagawad Jose Navarro lang ang wala iapil ni Porcadilla sa iyang gipasaka nga criminal complaint ngadto sa anti graft office. – BANAT NEWS