Patay'ng tawo

Cebu - Usa ka patay’ng lawas sa wala hiilhing tawo ang napalgang naglutaw sa kadagatan sa Bantique, lungsod sa Bantayan ning lalawigan niadtong miaging buntag.

Si Cepriano Espina, hingkod, minyo nga taga barangay Guiwanon, sa maong lungsod, ug usa ka mananagat maoy misumbong sa kapolisan bahin sa patay’ng lawas nga iyang nakit-an. 

Si PO3 Raul Hernaiz ug PO2 Eric Ilustrisimo sa Bantayan Police Station maoy misaog sa patay’ng lawas ug gidala sa pantalan sa lungsod aron maawtopsihan..

Si Dr. Liza Rivera kinsa maoy miawtopsiya mibutyag nga ang biktima nga gibanabana nga may 40 anyos ang pangidaron namatay gumikan sa pagkalumos.

Ang biktima nagsul-ob og navy blue nga T-shirt, nga walay sapot sa ubos nga bahin sa iyang lawas, bungoton, aduna usab kini tattoo nga dragon diha sa tuong bahin sa iyang bukton. - Rica Calinawan (BANAT NEWS)