Kandila misunog sa 7 ka balay

Cebu - Gumikan sa kandila nga giduwaan sa mga bata, nasunog ang 7 ka panimalay didto sa sitio Guiwanon , barangay Looc dakbayan sa Lapulapu sa milabay’ng gabii.

Si FO2 Julius Gujar sa Lapulapu City Fire Station mibutyag sa Banat News nga ang kayo nagsugod sa panimalay ni Romeo Patalinhug diin giingong may mga bata nga nagduwa og kandila sulod sa lawak niini.

Matud pa ni FO2 Gujar nga dali kaayong nakakatap ang kayo sa mga kasilinganan ni Patalinhug kansang mga panimalay hingpit gyud nga naugdaw sama sa balay ni Willy Patalinhug, Eduardo Patalinhug, Ricardo Patalinhug ug Senforiana Patalinhug, ug hinuon ang laing duha ka balay nga gipaabangan ni Senforiana Patalinhug parsyal lang ang pagkasunog niini.

Nasayran usab nga atol sa maong sunog, ang usa ka molupyo nga si Fermin Ymbong Jr. nakuryentehan dihang usa ka wire sa kuryente naputol ug mitugsaw kini sa usa ka tubigong dapit sa maong barangay.

Nadawat sa kabomberohan ang alarma sa mga alas 7:25 sa gabii nga gipaubos sa 3rd alarm ug nakontrolar sulod sa upat ka minutos ug gibanabana ang katibuk-ang kadaot nga mikabat og P800 mil. – BANAT NEWS