Kano nagduwa og armas, na-ulo
Cebu - Napusilan sa ulo ang usa ka American citizen human kini magduwa og armas sulod sa iyang lawak uban sa iyang mga higala sa Seaside Pusok dakbayan sa Lapulapu kagahapon sa kaadlawon.
Ang naangol mao si Gilbert Jao Lopez, 27, residente sa maong dapit nga sumala pa ni SPO2 Rex Ybañez sa Homicide Section sa kapolisan sa dakbayan sa Lapulapu uban sa iyang mga higala si Lopez dihang nahitabo ang aksidente.
Kainom ni Lopez sila si Reno Andales, usa ka ginganlan og Mayong ug ang magsuong Cristhoper Cananea, Edward Cananea gikan nag-inom sa usa ka dapit ug sa pag-uli sa panimalay ni Lopez mikuha kini sa kalibre 9mm nga pistola.
Gikatahong gibadlong kini ni Andales apan wala mopatuo ug mibutang hinoon og magazine sa armas dayong kasa niini ug gitumong sa ulo.
Nakugang nalang ang tanan sa dihang mibuto ang maong armas hinungdan sa samad pinusilan sa ulo ni Lopez hinungdan nga ila kining gidala sa Mactan Doctors Hospital ug sa pagsuwat ning balita anaa pa kini sa kritikal nga kundisyon og gipaubos sa operasyon.
Samtang ang armas ug mga bala anaa karon sa kustodiya sa kapolisan sa dakbayan sa Lapulapu lakip na ang empty shell sa maong armas.
Si Lopez miabot dinhi sa Pilipinas gikan sa Amerika niadtong Disyembre sa milabayng tuig aron magkabakasyon ug gikatakdang mobalik sa Amerika karong bulana. – BANAT NEWS
- Latest
- Trending
