Kap nagpa-tigbakay

Cebu - Gireklamo sa pipila ka mga residente sa barangay Carreta ang ilang kapitan nga si Eduardo Lauron tungod sa pagpasiugda niini og tigkabay.

Base sa report nga nadawat sa Banat News, nagsugod ang kapitan pagpasiugda sa tigbakay sulod sa gipuy-an niining compound niadtong Disyembre 22.

Dugang kasayuran nga gihatag sa mga reklamante nga ang tigbakay giingong molanat pa hangtod sa sunod semana.

Butang kini nga nakapadismaya ug nakabalaka sa pipila ka mga mulopyo tungod kay ang ila mismong barangay kapitan maoy nagpasiugda niini.

Sa dihang gikuhaan og reaksyon sa kamatuoran sa maong reklamo, giangkon ni Lauron nga siya nakapasiugda og tigbakay diha sa ilang barangay.

Apan gitataw sa kapitan nga pipila lang ka higayon atol sa nangaging okasyon nga siya mipasiugda sa maong matang sa ilegal nga sugal.

“Niadto ra tong Disyembre 25 ug Enero 1 unya mihangyo man ang uban mao nga kutob lang adtong Enero 4 mao ra,” sumala ni Lauron.

Kusganong gipanghimakak sa kapitan nga duna pay tigbakay nga gipahigayon diha sa ilang barangay niining higayona.

Gipadayag ni Lauron nga iya nang gipabungkag ang ruydahan ug gani ang kapitan misugyot ning tagsulat sa pagsusi sa ilang compound.

Apan ang direktor sa Cebu City DILG nga si Dr. Patricio Gabuya nipadayag nga dili maayo sa mata sa tawo ang gihimo sa kapitan.

Matud sa City DILG director nga isip amahan sa barangay dili angayan nga kini maoy mopasiugda ug bisan unsang matang sa ilegal nga sugal.

“Dili gyud na appropriate kay tigbakay pa, kahibawo gud ang tanan nga illegal na, dili gyud na angayang pasiugdahan og kapitan,” nagkanayon si Gabuya.

Tambag ni Gabuya ngadto sa mga reklamante nga modangop sa konseho sa dakbayan aron ma-imbestigahan ang gihimo sa ilang barangay kapitan. – BANAT NEWS