Cebu - Boluntaryong mitahan sa iyang kaugalingon ngadto sa kapolisan sa dakbayan sa Talisay niadtong Lunes sa hapon ang usa ka 17-anyos nga bata kinsa giingong dunay kalambigitan sa pagpusil-patay sa usa ka lalaki niadtong Biyernes sa gabii diha sa sitio Hollow Blocks, barangay Lagtang, dakbayan sa Talisay.
Ang nahisgutang bata ang nagtago-tago human sa maong hitabo apan nakahukom nga motahan sa iyang kaugalingon ngadto sa mga polis ug gikuha nila ni PO2 Lino Diez ug PO1 Erwin Carbonquillo sa lungsod sa San Fernando gikan sa balay sa paryente niini.
Ang suspetsado miangkong siya maoy mipusil kang Ramil Obello, 29, residente sa nahitaboan uban niya sa maong pagpamusil sila si Jennifer Tabal ug Rolly Garcia pulos hingkod ang panuigon nga mga residente sa barangay Lawaan III, dakbayan sa Talisay ug gipangita pa karon sa mga polis.
Kahinumduman nga si Obello ang migawas gikan sa ilang balay dihang nabantayang may wala mailhing tawo nga nanglili sa ilang pultahan ug iyaha kining gisundan apan pag-abot diha sa hawan nga lote kalit siyang gipusil niini.
Si Obello nakaangkon og usa ka samad pinusilan sa likod nga bahin sa iyang ulo nga gituohang maoy hinungdan sa iyang kamatayon. – BANAT NEWS