CEBU - Instructor sa Cebu City Police Office firing range ingon man security consultant sa usa ka dakong kompaniya dinhi sa Sugbu gireklamo nga nang-spray og teargas sa usa ka ginang niadtong alas 3 sa kaadlawon, Enero 1 ning tuiga diha sa gawas nga bahin sa ganghaan sa Maria Luisa Subdivision, barangay Banilad ning dakbayan.
Ang gireklamo giila sa kapolisan nga si Bing Mendesona, nagpuyo sa naasoy’ng subdivision, samtang ang mireklamo mao ang ginang nga si Gladys Uy, 38, minyo nagpuyo usab sa nahisgutang lugar.
Si Mendesona gikatahong kanhi sakop sa Los Angeles Police Department sa Estados Unidos.
Si PO2 Jonas Velez nga gikahinabi sa Banat News nagkanayon nga ang biktimang si Uy nagmaneho kini sa iyang sakyanan sa dihang gipara ni Bing Mendesona alang sa pagpahunong.
Sa walay hinungdan kalit kining nangisog dayon mi-spray ngadto kaniya sa wala matinong hinungdan nga maayong pagkasunog sa iyang abaga.
Human sa maong insidente ang suspetsadong si Mendesona dali kaayong mibalik sulod sa nahisgutang subdivision samtang si Uy mi-report usab ngadto sa kapolisan. (BANAT NEWS)