FTP nga gitigbas gitaoran medalya

CEBU - Usa ka Field Training Police (FTP) nga natigbasan atol nga miresponde og alarma niadtong Bag-ong Tuig gisab-ita’g medalya sa director sa kapolisan dinhi sa Central Visayas.

Si Police Regional Office-7 Chief Supt. Ronald Roderos uban kang CCPO Director Sr. Supt.Patrocinio Comendador ug Sr. Insp. Proctoso Lim, hepe sa Talamban Police Station maoy nangunay pagsab-it og Medalya ng Sugatang Magiting kang PO1 Daryl Velasco, 27, sulod sa Chong Hua Hospital kagahapon.

Gawas sa medalya, si Roderos mitunol usab og P5 mil nga cash ngadto kang Velasco isip financial assistance dungan sa pagpahibalong ang PRO-7 maoy mobayad sa sobra sa bayran sa hospital sa kagamhanan sa dakbayan nga daan nang mipadayag nga maoy moabaga sa galastuhan sa maong polis.

Niadtong Huwebes sa gabii sa miaging semana sila si PO1 Velasco, kauban niining FTP nga si PO1 Eric Diamante ug PO3 Jumar Viscara mitubag og alarma diha sa Upper Agsungot, barangay Agsungot bukirang bahin ning dakbayan sa dihang usa ka Noel Limpag nga tanod sa maong barangay nangayo og police assistance kabahin sa usa ka lalaki nga nagmaoy tungod sa kahubog nga giilang si Noel Ermac.

Apan sa ilang pag-adto walay daghang pangutana gitigbas ni Ermac si PO1 Velasco diha sa ulo, tuong nawong ug bukton.

Si PO1 Diamante nga nakakita sa pagtigbas daling mipusil kang Ermac makausa ka higayon sa dala niining M16 Rifle diha sa ulo nga nakaingon sa hinanali niining kamatayon.

Si Roderos miingon sa higayon nga makagawas na si PO1 Velasco sa hospital ug hingpit nang mahuman niini ang unom ka bulan nga FTP ug laing unom ka bulan sa Public Safety Recruit Basic Course iya kining hatagan og prayoridad nga irekomendar nga madestino diha sa Cebu City Police Office (CCPO).   (BANAT NEWS)