Mananagat buhi diay

CEBU - Usa diay ka dakung buhi ang usa ka mananagat nga taga isla sa Bantayan nga una nang gika-report nga patay nang nabangalan didto sa kadagatan sa Escalante City niadtong Domingo sa udto.

Si PO3 Juanito Yunting sa Sta. Fe Police dihang nahinabi sa Banat News niila sa maong mananagat nga si Mariel Layao Rayco, 18, lumad nga taga barangay Ukoy sakop sa maong lungsod.

Matud ni PO3 Yunting gitawgan sila sa kapolisan sa lungsod sa Bantayan nga gipahibalo sa patay’ng lawas ni Rayco nga nabangalan didto sa Escalante City hinungdan nga nakig-alayon dayon sila sa kapulisan sa Escalante.

Apan sa bag-ong kalamboan nakumpirmar ni PO3 Yunting kagahapon lang sa udto nga dakong buhi ang maong mananagat nga gidagsa sa maong lugar human malunod ang pumpboat niini sa pagpanagat niadtong Sabado sa gabii.

Sa dugang pakisusi nga gihimo ni PO3 Yunting nasayran nga ang biktima kauban sa laing tulo pa ka mga kauban niining mananagat ang nigikan kini alas 7:00 sa gabii aron sa pagpanagat apan nakasugat sila og dagkong bawod ug hangin dala sa bagyong si Auring nga niresulta sa ilang pagkabuwag-buwag ug bugtong si Rayco ang na-missing.

Ang mga kabanay sa biktima nakig-alayon na sa kapolisan sa Escalante City aron makapauli pagbalik sa isla sa Bantayan ang    maong mananagat.    BANAT NEWS)