Advance voting ok apan...

CEBU - Pabor si Cebu City Election Officer Marchel Sarno sa balaudnon nga magtugot sa pagpahigayon og sayong pagbotar sa mga botante unya sa 2010 elections.

Ang kongresista sa Cagayan de Oro nga si Rufus Rodriguez maoy nipalabang sa House Bill 5578 nga alang sa maong katuyoan.

Tumong sa kongresista niini nga mosaka ang gidaghanon sa turn-out sa mga mobotar sa gitakdang eleksyon sunod tuig.

“Mao man gyud na ang gitinguha sa Comelec nga motaas ang turnout sa mga botante aron maingon nato nga malampuson ang pagpahigayon sa eleksyon,” sumala ni Sarno.

Nagduda hinuon ang election officer nga mabasura ra ang nahisgutang balaudnon tungod usab sa mga disbentaha nga dala niini.

Usa sa nakitang babag ni Sarno sa early voting mao ang pundo nga gastuhon unya sa Comelec alang sa pagpahigayon sa sayong pagbotar sa mga botante.

“Nindot unta kaayo ang balaudnon pero wala pa man gani hatagi sa kongreso og gahin ang Comelec alang sa poll automation,” dugang pamahayag ni Sarno.

Gawas niini niingon ang election officer nga dili pa usab matino kung pila ang mopahimulos sa early voting ug kung kini dili ba maalkanse sa gasto ang gobiyerno.

Alang kang Sarno, mas angayang unahon sa paghatag og patagad sa kongreso ang dugay na nga gitinguha sa gobiyerno nga computerization sa eleksyon.

Ang Comelec nangayo sa kongreso og kapin sa dos bilyones pesos nga gahin alang sa poll automation sa umaabot nga piniliay.

Apan pipila ka mga magbabalaud ang nipadayag nang daan nga labihang dakoa sa maong gahin ug kini giingong lisod ikahatag sa gobiyerno.    BANAT NEWS)