Nag-disco gipusil

CEBU – Usa ka ulitawo nga nalingaw og sayaw sa diskohan gipusil angol didto sa bukirang bahin sa Sitio Mangitngit barangay Sandayong siyudad sa Danao kagahapon sa 1:20 sa kaadlawon nga gituohang may kalambigitan na usab sa nagdinumtanay nga mga miyembro sa fraternity sa maong dapit.

Ang biktima nga anaa karon sa talandugong kahimtang sulod sa usa sa mga tambalanan dinhi sa dakbayan sa Sugbu mao si Dondie Batulan, 20, ulitawo, nga taga barangay Binaliw sa nahisgutang siyudad.

Si SPO4 Edgar Gomez sa Danao City Police Station mibutyag sa Banat News nga ang biktima kauban sa iyang mga igsoon ug paryente, puwerting nakalumpayat og sayaw kauban ang lain pang mangdiskohay niadtong higayona dihang kalit kining gipusil .

May pipila ka mga saksi nga mitug-an sa kapulisan nga may usa ka wala hiilhing batan-on nga nagpaniid didto sa gawas nga bahin sa koral sa diskohan nga maoy miluthang sa biktima.

Giatol gyud pagtiro dihang miatubang sa koral ang biktima hinungdan nga nasabak ang tiyan niini .

Gumikan sa maong hitabo nabungkag ang disko dihang nag-iyahay pagkaratel og panagan ang mga nanisko.

Samtang gidali paghatod sa tagtungod ang biktima ngadto sa Danao District Hospital apan gumikan sa katalandugon niini , gipalahos nalang sa dakbayan sa Sugbu. – BANAT NEWS