CEBU – Gibalhog sa bilanggoan ang usa ka dispatser nga nadakpan sa akto nga nangulekta og “tong” gikan sa mga drayber sa traysikol ug multicab isip bugti sa mosakay nga mga pasahero.
Ang nadakpan mao si Roseller Rosales, 31, minyo, nga taga dakbayan sa Mandaue.
Si PO1 Ramon Velez sa kapolisan sa maong dakbayan mibutyag sa Banat News nga nasigpatan nila si Rosales sa akto nga nangulekta og kuwarta gikan sa mga drayber isip bayad sa iyang pagsing-al ug pagpanawag og mga pasahero.
Matud pa ni PO1 Velez nga usa ka dakong kalapasan ang panispatser kay giisip kining “tong collection” nga maoy hinungdan nga gidakop nila si Rosales.
Dugang pa niya nga ang magpatrolya nga kapolisan sa palibot sa kadalanan sa dakbayan nga makaakto sa mga dispatser nga mangolekta og tong kinahanglang modakop gyud niini ug ibalhog sa prisohan. – BANAT NEWS