VK ug Moli-moli 'anam na og kahurot - Pe

CEBU – Padayon karon ang pagkunhod sa mga video karera ug moli-moli machine nga gipahimutang sa mga operator diha sa nagkadaiyang kabarangayan sa dakbayan sa Sugbu.

Kini maoy gipasigarbo ni Konsehal Agustus Pe sukad gisugdan ang ilang hinugtanay nga kampanya batok sa maong mga kahimanan sa illegal nga sugal niadtong tuig 2005.

Gani niingon ang konsehal nga sa miaging tuig, katulo na lang ka higayon nga sila nakaguba og mga video karera ug moli-moli machine.

Ang unang higayon natigayon niadtong buwan sa Pebrero diin 82 ka video karera ug moli-moli machine ang gidugmok sa atubangang bahin sa city hall.

Laing 105 usab ang gipangguba niadtong buwan sa Hulyo ug sa miaging buwan dugang 103 usab ka video karera ug moli-moli machine ang gipangbungkag.

“Dako kaayo og deperensya because ang availability sab sa mga illegal machine sa mga barangay gamay na man lang, gamay na lang sab ta og mahipos,” sumala ni Pe.

Ang konsehal nga maoy chairman sa Committee on Public Order and Safety sa City Council niingon nga sa miaging pipila ka tuig, halos matag buwan silang mopahigayon og pagpangguba sa mga video karera ug moli-moli machine.

Kini tungod usab sa naghitak pa nga mga gambling machines sa nagkadaiyang kabarangayan, apan karong milampos na ang kampanya dako ang pasalamat niini sa mga hingtungdan.

Nataligam-an hinuon sa konsehal sa paghisgot kung kini duna na bay operator sa maong mga kahimanan sa illegal nga sugal nga ilang nadakpan ug napasakaan og kaso.

Apan gipadayag ni Pe nga magpadayon ang ilang hinugtanay nga kampanya niining tuiga batok sa operasyon sa video karera ug moli-moli machine. – BANAT NEWS