Pro-life messages ni Papa ipakatap sa Simbahan

CEBU – Kampanya batok sa aborsyon, artificial birth control ug pagpangita og pamaagi aron mahaw-as sa kakabus maoy unod sa Papal message alang sa mga sumusunod sa Romano Katolikong Simbahan nga gisugdan na og pakatap sa Archdiocese of Cebu gikan sa Santo Papa Benedict XVI sa Bag-ong Tuig.

Sumala pa sa Santo Papa, dakong supak sa pagtulun-an sa simbahan ang pagkutlo sa kinabuhi diha sa sabakan sa usa ka inahan kon aborsyon ingon man ang mga pamaagi sa artificial birth control.

Lakip usab sa gipanawagan sa Santo Papa mao ang pagpangita og pamaagi aron mahaw-as sa kakabus nga maoy hinungdan sa mga kagubot sa tibuok kalibutan.

Ang tigpamaba sa Archdiocese of Cebu nga si Msgr. Achilles Dakay nipadayag nga tukma ang mensahe sa Santo Papa taliwa sa nasinati karong global financial crisis. Giklaro hinoon ni Dakay nga ang naapektuhan karon sa krisis mao lang kadtong mga adunahan ug mga kapitalista ug dili ang mga kabus sa katilingban.

Kini tungod kay matud ni Dakay, dugay na nga nag-antos ang mga kabus sa kalisod ug kini nahimo nang ordinaryo sa ilang kinabuhi.

Gitataw ni Dakay nga usa ka dakong hagit ang mensahe sa Santo Papa ilabi na nga dunay mga magbabalaud sa nasud nga gustong mapalabang ang Reproductive Health Bill.

Sumala pang Dakay, dili mohunong ang simbahan pagpangita og mga paagi aron mabasura sa hingpit ang kontrobersyal nga balaudnon.

Ang Reproductive Health gikatahong magdasig sa mga Pilipino ilabi na sa mga kabus sa paggamit ug mga contraceptives sama sa condom, pills ug uban pa. Sa pikas bahin, miingon si Dakay nga ang kalinaw makab-ot lang usab kung mopatigbabaw ang dugukan niini nga mao ang kamatuuran, hustisya, gugma ug kagawasan.

Nidugang si Dakay nga kini lisod masunod kung magpabilin nga mosukwahi ang katawhan sa kabubut-on sa labaw'ng makagagahom.

“Lagi kay ang peace can not be built if we do not tell the truth, follow the sign of justice, do not obey the law of love and we do not set people free,” sumala ni Dakay.

Nanghinaot si Dakay nga patalinghugan sa katawhan sa mensahe sa Santo Papa ug malamdagan ang mga huna-huna niini sa angayan nilang buhaton. – BANAT NEWS