Biktima sa gang namatay

CEBU – Patay na nga miabot sa tambalanan ang usa ka minor de edad nga lalaki human kini pusila sa iyang duha ka silingang batan-on sa F. Ralota St. sa barangay Poblacion dakbayan sa Danao sa milabay’ng gabii.

Ang 17-anyos nga biktima residente sa barangay Looc sa nahisgutang dakbayan ug wala na magtungha, samtang ang gitumbok nga responsable sa pagpamusil mao si Roel Nuñez ug Ian Laurel, mga batan-on ug silingan sa biktima.

Base sa pasiunang imbestigasyon sa kapolisan sa Danao pinaagi ni SPO2 Ramir Oliverio, nasayran nga samtang naglakaw ang biktima sa usa ka mall sa maong dapit sa milabay’ng gabii iyang gikasugat sila si Nuñez ug Laurel.

Matud pa sa mga nakasaksi nagkalalis ang mga batan-on ug diha-diha kalit nga mibunot si Nuñez og armas mobuto ug kalit gipusil ang biktima diha sa dughan.

Ang batan-on daling gidala sa Danao District Hospital apan gideklarar kini nga patay nang miabot didto.

Samtang sa pagresponde sa kapolisan nakalayas na ang mga responsable nga sila si Nuñez ug Laurel.

Nagduda ang kapolisan sa Danao nga usa kini ka gang o frat-related nga hitabo apan wa pa sila makatumbok kung kinsa, unsang grupo sa fraternity ang biktima o ang mga suspetsado. – BANAT NEWS