Balay gidauban sa kaugalingong anak

CEBU – Naugdaw sa hingpit ang usa ka panimalay human gidauban sa ilang kaugalingong anak niadtong Biyernes sa buntag sa barangay Kawit lungsod sa Pilar Isla sa Camotes.

Usa ka Rosdie Laruya, 25, ang gitanggong sa kapulisan sa lungsod sa Pilar samtang gihikay pa ang kasong arson batok kaniya tungod sa pagsunog niini sa ilang balay.

Base sa imbestigasyon nila ni PO1 Abelardo Biton ug PO1 Florante Gurrea kinsa maoy miresponde sa maong alarma, usa ka Ermie Yamas ang mitug-an nga adunay panimalay nga gidauban sa barangay Kawit.

Nasuta nila ni PO1 Biton ug Gurrea nga ang panimalay sa pamilyang Laruya maoy naugdaw ug ang suspetsado maoy mihimo niini, wala pa matino sa kapolisan kung unsay rason nga gihimo kini sa suspek.

Matud pa sa amahan sa akusado nga si Eduardo Laruya, 56, nga uban siya sa iyang asawang si Dolorosa, 52, anak babaye nga si Rosalia ug Melanie ingon man ang suspek nga anak (Rosdie) didto sa ilang umahan sa wala pa mahitabo ang pagdaob sa ilang panimalay.

Ang amahan nitug-an nga niuna’g uli ang iyang anak nga akusadong si Rosdie apan pipila ka minutos mga alas 11 sa buntag niadtong Biyernes ang barangay tanod sa ilang lugar nga si Ignacio Labisores ang nagpahibalo nga naugdaw ang ilang panimalay human gidauban ni Rosdie.

Ang Banat News nisuway untag kontak sa cell phone number ni Police Sr. Insp. Danilo Delantar ang hepe sa kapulisan sa Pilar apan way motubag niini.  – BANAT NEWS