Sinulog tickets first-come, first-serve

CEBU – Nagsugod na pagpamaligya og mga ticket ang Sinulog Foundation alang niadtong motan-aw sa Sinulog 2009 diha sa Abellana Grandstand.

Matud ni Sinulog executive director Ricky Ballesteros nga sama sa gihapon, ang Sinulog ticket mapalit sa tag-P350, P450 ug P550.

Gitataw ni Ballesteros nga limitado lang ang ilang gipamaligyang ticket hinungdan nga kini giingong first-come-first-serve basis.

Giklaro sa executive director sa Sinulog nga ang mga ticket anha lang mapalit sa ilang buhatan diha sa Cebu City Sports Center.

Subay niini gipahimangnoan ni Ballesteros ang publiko nga dili magpailad niadtong mga tawo nga namaligya og Sinulog tickets gawas sa ilang buhatan.

“Ako lang pahimangno sa publiko nga dili gyud sila mo-entertain anang ipamaligya nga Sinulog ticket diha sa gawas,” sumala ni Ballesteros.

Sa samang higayon dunay pasidaan usab ang executive director sa Sinulog ngadto sa mga scalpers partikular niadtong namaligya og mga mini nga ticket.

“Dili gyud sila magmahay kay kung amo nang mahibaw-an, dakpon gyud namo sama sa among gihimo last year nga duna mi gipapriso,” nagkanayon si Ballesteros.

Sa pikas bahin, gipahibawo ni Ballesteros nga hapit na matapos ang ilang gihimo nga pagpangandam alang sa Sinulog 2009.

Ang mga contingent nga mosalmot sa Sinulog sa Kabataan sa Dakbayan ingon man sa Lalawigan giingon ni Balleteros nga subsob na usab nga nagbansay-bansay.

Sa 20 ka mga contingent nga modaug sa maong indigay mamahimo unyang automatic nga makasalmot sa Sinulog Grand Parade karong Enero 18.

Gipahibawo nang daan ni Ballesteros nga ang deadline sa registration sa Sinulog Grand Parade gitakda na karong Enero 12.

Subay niini giawhag na sa Sinulog Foundation ilabi na ang mga out-of-town contingent nga magpalista na aron sigurado nga makasalmot sa Sinulog 2009.  – BANAT NEWS