CEBU – Gitinguha karon ni Cebu City Councilor Joey Daluz nga mawagtang na ang ‘age limit’ requirement sa mga aplikante nga mapatik diha sa mga job advertisements.
Ang konsehal nagplano pagpalabang og ordinansahon alang niini human usab makamatikod nga halos tanang makita sa classified ads dunay age range.
Alang kang Daluz nga ang pagbutang og edad sa ilang gipangita nga mga aplikante usa ka matang sa diskriminasyon tungod kay niining paagiha di tanan ang mahatagan og kahigayonan nga maka-apply sa trabaho.
Gani niingon si Daluz nga didto sa Amerika dili mahinungdanon ang edad sa usa ka job applicant kung ang trabaho wala magkinahanglan niini.
“I agree nga it’s a kind of age discrimination ba kay sa Amerika gani dili man mo-require ang kompanya og edad sa mga aplikante,” sumala ni Daluz.
“I will file an ordinance nga mag-prohibit sa mga kompanya pagbutang og age requirement unless gikinahanglan gyud sa trabaho,” dugang pamahayag ni Daluz.
Matud sa konsehal nga tukma ang pagpalabang og ordinansahon alang niini ilabi na nga gipaabot nga magnihit ang bakanteng trabaho niining tuiga.
Makighinabi pa hinuon si Daluz ngadto kang Konsehal Edu Rama sa iyang plano tungod kay kini maoy chairman sa Committee on Labor and Employment sa City Council.
Nasayran nga ang duha ka konsehal mao usab ang nangamahan sa usa ka ordinansa sa dakbayan nga may kalabutan gihapon sa mga job advertisements.
Gidid-an sa maong ordinansa ang local media partikular na ang mga newspaper pagpagawas og job advertisements nga dili mobutang sa pangalan ug address sa kompanya.
Tumong niini nga maprotihian ang mga aplikante gikan sa posibleng mga illegal recruiter nga magtakuban pinaagi sa paggamit og codenames. – BANAT NEWS