Polis nga nakapatay sa mitigbas og polis pasidunggan og medalya

CEBU – Irekomendar sa mga kadagkuan sa Cebu City Police Office ang mga police nga nakapatay sa tawong mitigbas sa usa ka polis nga ni-responde sa stabbing alarm sa Upper Agsungot ning dakbayan niadtong Enero 1 sa alas -siyete sa gabii ning buwana.

Si PO1 Daryl Velasco (FTP) na destino sa Talamban Police Station natigbasan sa iyang ulo, lawas ug nawong.

Human gikalitan og tigbas sa suspetsadong si Noel Ermac kinsa nagmaoy nga nagdala sa iyang 21 ka pulgadas nga sundang human usab kini makadunggab og tanod.

Si PO1 Veloso ang luwas na hinuon sa makuyaw nga kahimtang sa Chung Hua Hospital sa iyang mga samad tinigbasan, apan ang suspetsadong si Ermac namatay atol sa insidente human pusila ni PO1 Eric Diamante sa gidala niining Armalite tumong sa ulo.

Sa text-messages ni Sr. Supt. Patrocinio Comendador sa Banat News kini nagkanayon nga iyahang i-rekomendar ang mga nalambigit nga polis aron mahagatan og medalya ug pasidungog gikan sa PNP.

Gipahibalo ni Comendador nga dili mausab ang ilang policy sa pag-responde sa matag alarma gumikan lang sa maong hitabo nga natigbasan ang usa ka polis.

Matud pa niini nga ang matigbasan, masamdan o makabsan sa kinabuhi parte lang kini sa risgo sa pagpamolis ug ang nahitabo kang PO1 Velasco usa ka ehemplo sa samang sitwasyon.

Wala hinuoy nakitang pagkulang si Comendador sa gihimo sa grupo ni Veloso pagresponde ug gani angayan pa silang daygon ug dili sawayon tungod kay ilang kinabuhi ang ilang girisgo aron maluwas ang ubang tawo.

Nasayran nga sila si PO1 Velasco, PO1 Eric Diamante, PO3 Jumar Viscara, ni-responde human ang barangay tanod sa Agsungot, Noel Limpag gidunggab sa suspetsado apan dihang dakpon nidagan sa ngitngit nga dapit sa panimalay niini ug gikalitan pagtigbas si Velasco.  – BANAT NEWS