Bata gianod gikan Bohol patay na

CEBU – Usa ka patay’ng lawas sa batang lalaki nga gituohang naanod gikan sa lungsod sa Clarin, Bohol ang napalgan sa duha ka mananagat nga naglutaw kagahapon sa buntag diha sa lawod sa sitio Sambagan, barangay Tanke, dakbayan sa Talisay.

Ang patay’ng lawas gituohang iya ni Harold Ramos, 6-anyos kinsa nauban sa pagkaanod sa iyang apohan sa paglunop sa suba sa barangay Poblacion Centro sa lungsod sa Clarin niadtong Disyembre 31, 2008.

Si SPO1 Oliver Dacua, duty desk officer sa Talisay City Police Station nakadawat sa taho gikan kang Carlo Duga-duga, station manager sa Aksyon Radyo kabahin sa maong patay’ng lawas nga nakit-an.

Sila si SPO1 Archimedes Judilla, PO3 Ronaldo Dano ug PO2 Narciso Alforque sa homicide section ang daling miresponde ug misusi sa patay’ng lawas.

Base sa imbestigasyon ni PO3 Joel Rosales nga ang maong bata ang napalgan nila ni Danny Limpiado ug Ramy Delfin kinsa nanagat niadtong higayona nga naglutaw ug ang sampot niini ang unang migimaw nga walay purol.

Ang bata nagsul-ob lang og sando nga color gray ug green hinungdan nga dali siyang nangayo og panabang sa mga tanod sa barangay Tanke.

Si Dacua sa pakighinabi niini sa Banat News kagahapon sa buntag mibutyag nga si Duga-duga ang nakighinabi sa Bise Mayor sa Clarin ug nagkanayon nga mitukma ang deskripsiyon sa bata nga nawagtang didto sa ilang lugar kinsa naanod sa baha.

Ang patay’ng lawas sa nahisgutang bata naa karon sa Saint Francis Funeral Homes sa N. Bacalso Avenue sa dakbayan sa Sugbu.

Si Dacua   midugang ang bise mayor sa Clarin mipasalig nga maoy moabaga sa galastohan sa pagkuha gikan sa punerarya sa patay’ng lawas sa biktima.

Niadtong Disyembre 31 sa kaadlawon mibunok ang kusog nga ulan sa tibuok Central Visayas ug tulo ka mga lungsod sa Bohol nga gilangkuban sa Clarin, Inabanga ug Tubigon ang nakasinati og pagbaha.

Diha sa Clarin mi-overflow ang duha ka mga suba nga nakaingon sa pagkabanlas sa panimalay lakip na sa panimalay sa mga Ramos nga miresulta usab sa pagkaanod ni Ebaristo “Titing” Ramos ug sa apo niining si Harold, si Ebaristo patay na dihang nakit-ang nasangit sa mga gapnod samtang missing ang apo niini.

Ang disaster action officer sa lungsod sa Clarin nga si Konsehal Isidro Arsiles sa pakighinabi sa Banat News human sa maong trahedya mibutyag nga mi-overflow ang Sumaquid River sa sitio Caugnay sa barangay Poblacion Centro diin mahimutang ang panimalay sa mga biktima.

Gawas sa maong suba mi-overflow usab ang Bacani River diha sa barangay Bacani hinungdan nga ang naapektahang barangay miabot ngadto sa Candahic; Bonbon, Poblacion Norte diin mahimutang ang munisipyo, Tamaran ug Bacani.

Gawas sa kinabuhi ug kabalayan, nangalumos usab ang mga kahumayan daplin sa nahisgutang mga suba ilabi na diha sa barangay Mataob ug Cumaang. – BANAT NEWS