Politika sa Mandaue mibukal na

CEBU - Gilauman ang pagbukal sa politika sa tuig 2009 sa dakbayan sa Mandaue ug hipanglantawan nga mao na usab ang tukmang panahon sa ilang pagsugod sa pagsuroy sa kabarangayan alang sa pagpaduol sa katawhan nga ilang giserbisyohan.

Nunot sa maong pagbukal sa politika sa dakbayan maoy masinati ang pagtumaw usab sa mga intriga sa habig sa oposisyon nga gipangulohan ni Bise Mayor Carlo Fortuna ug sa administrasyon nga gipangulohan ni Mayor Jonas Cortes.

Si Cortes kinsa midaug isip mayor sa dakbayan sa 2007 eleksiyon maoy standard bearer sa ilang grupo ubos sa Team Honesty ug tandem niya si kanhi Konsehal Glenn Bercede nga karon maoy barangay kapitan sa Banilad sa dakbayan sa Mandaue.

Napilde si Bercede ug maoy midaug si Fortuna ug midaug usab si Cortes alang sa pagkamayor ug napilde usab ang anak ni kanhi Mayor Ouano nga si Jovito Thadeo “Jonkie” Ouano nga maoy tandem ni Fortuna sa Power Team.

Si Mayor Cortes nga anaa pa sa iyang unang termino ang magpasubli sa iyang katungdanan sa 2010 lokal nga piniliay ug si 6th District Representative Nerissa Soon-Ruiz nga anaa na sa iyang katapusang termino ang gipaabot nga maoy mosakbang niini.

Labing lig-ong kaatbang ni Cortes si Representative Soon-Ruiz sanglit sa wala pa kini magbalik-balik sa gihuptan niyang katungdanan isip kongresista sa ikaunom nga distrito sa lalawigan sa Sugbo daan na kining nagserbisyo isip sakop sa hunta probinsiyal.

Nakadugang sa iyang kalig-on ang pundok ni kanhi Mayor Ouano kinsa kusganon usab nga giduso sa mga lumolupyo sa 6th district nga mokandidato sa pagkakongresista isip hulip kang Soon-Ruiz nga motapos na sa iyang ikatulong termino.

Tungod sa lig-on niyang kaatbang alang sa iyang pagpasubli sa katungdanan maoy gipaabot nga pagahimoon ni Cortes ang pagsuroy sa kabarangayan pinaagi sa paghugpong sa iyang mga dumadapig.

Kini pagalangkoban sa mga senior citizen, mga batan-on ug mga hingkod na ang panuigon, mga bayot ug mga tomboy o kababayen-an kini alang sa pagsiguro sa kadaugan sa 2010 nga piniliay.    (BANAT NEWS)