Gitaktak sa trabaho ipa-report sa DOLE

CEBU - Gi-awhag sa Regional Tripartite Wages and Productivity Board (RTWPB) ang mga gitaktak nga kawani sa mga kompaniya dinhi sa Sugbo pag-report ngadto sa Department of Labor and Employment (DOLE-7).

Ang private sector representative sa RTWPB Marianito Ventura nagduda nga adunay daghang mga kompaniya dinhi sa Sugbo ang mihimo og ilegal nga pagpanaktak sa ilang mga kawani ilabi na niadtong naapektahan sa global financial crisis.

Si Ventura subling mipasidaan sa mga kompaniya nga gikinahanglang mohatag og pormal nga notisya ngadto sa DOLE-7 uban ang balidong katarungan sa dili pa kini mohimo og lakang sa pagpanaktak sa ilang mga kawani.

Nasayran ni Ventura nga aduna nay kapin sa 2,000 ka mga kawani sa Mactan Export Processing Zone (MEPZ) sa dakbayan sa Lapulapu ang gitaktak sa ilang tagsa -tagsa ka mga kompaniya sa tuig 2008 ug nagduda siya nga aduna pay laing kompaniya nga nanaktak og trabahante sa hilom nga wala mopahibawo sa DOLE.

Gumikan niini gidasig niya ang mga apektadong kawani pag-sumbong ngadto sa DOLE-7 aron maimbistigar kini pagtino kun legal ba ang maong pagpanaktak.

 Nasayran nga sagad sa mga kompaniya nga nanaktak sa ilang kawani sa MEPZ-1 pulos mipasangil nga apektado sila sa krisis sa ekonomiya sa tibuok kalibotan.   (BANAT NEWS)