Pag-ulan hayan magdala og sakit

CEBU - Gipahimangnoan ang Department of Health kon DOH-7 ang publiko sa pagtumaw sa nagkalain-laing mga sakit dinala niining pagpunay og ulan mugna sa low pressure area sa Kabisay-an.

Sumala pa ni Dr. Eric Tayad, ang pangulo sa National Epidemiology Center sagad motumaw ang mga sakit sama sa dengue, cholera, hangga ug tipdas sa panahon sa ting-ulan.

 Nagkanayon si Tayad nga gikinahanglan nga bantayan sa mga ginikanan ang ilang kabataan nga dili mapaakan og lamok o makainom og kontaminadong tubig.

 Gidugang pa ni Tayad nga niining tuiga ang DOH molusad og "whole year long threat" batok sa dengue cases tungod kay gipaabot man nga niining tuiga posibleng magpunay og bunok ang ulan.

 Nipahimangno usab si Tayad nga ang katawhan angayan nga magmatngon sa imnon nga tubig tungod sa posibilidad nga makontaminado ang water supply ug matakbuyan og kagaw nga makaingon sa cholera.

 Samtang si DOH-7 regional director, Dr. Susana Maderieta nagpasalamat sa mga sakop sa media tungod sa malampusong programang "Iwas Paputok" diin ilang nakita ang resulta niini pinaagi sa pagmenus sa nabiktima sa pabuto karong tuiga itandi sa niaging tuig.

 Apan iyang gitataw nga nagkinahanglan usab sila sa suporta sa media alang sa dugang programa sa DOH nga nagpahibawo ug pag-edukar sa katawhan unsaon nga malikayan ang mga sakit mugna niining kausaban sa panahon.   (BANAT NEWS)