Isyung 'kurakot' way epek sa taga Cebu

CEBU - Dili apektado ang pipila ka mga opisyal dinhi sa Sugbo sa gipublikar nga record sa Sandiganbayan nga nagpakita nga ikaduha ang Central Visayas sa labing kurakot nga mga rehiyon sa tibuok nasud.

Si Kongresista Benhur Salimbangon sa ika-upat nga distrito sa lalawigan sa Sugbo mibutyag sa Banat News nga dili nalang siya molalis niini tungod kay importante alang niya nga mapalambo ang iyang pagserbisyo sa mga molupyo sa iyang distrito.

Matud ni Salimbangon nga mas gihatagan niya og pagtagad karon mao ang pag-atiman sa mga nasugdan niyang mga proyekto sama sa pagpasemento sa kadalanan sa mga lungsod sa Tabuelan, San Remegio, Daanbantayan ngadto na sa Medillen ingon man ang patubig project sa siyudad sa Bogo.

Apil na niini ang gi-promote niya nga pagpalig-on sa mga ro-ro port sa isla sa Bantayan ug sa siyudad sa Bogo ug sa Hagnaya, Daanbantayan.

Nunot niini gi-organisar ni kongresista Salimbangon ang “Korambos” diha sa iyang distrito nga nagpasabot kini sa hugtanong pag-alayon tali sa nasudnong kagamhanan, probinsya sa Sugbo, mga munisipalidad ug kabarangayan aron siya makahipos og dugang pondo nga magamit sa pagpatuman sa mga gikinahanglang proyekto.

Gipasigarbo sab sa kongresista ang nagpadayong konstruksyon sa proyekto niining retirement village diha sa barangay Luy-a ug Day-agon sa lungsod sa Medillen nga magsilbi unyang bakasyonan sa mga langyaw’ng turista ilabina sa mga Koreano ug makapalambo sa turismo ug makahatag usab og dugang oportunidad sa pagpanarbaho.   (BANAT NEWS)