Laing extension sa Mactan-Export Economic Zone nanaktak og trabahante

CEBU - Nagsugod na usab og panaktak og mga trabahante ang kompanya nga extension sa Mactan Export Processing Zone kon MEPZ sa barangay Cantaw-an dakbayan sa Naga.

 Segon pa sa nireklamong production workers nga dili lamang magpabutyag sa ilang mga pangalan, kapin 50 ka mga trabahante sa production sa Kyocera Kinseki Philippines Inc. sa Cantaw-an, Naga City ang gipaundang na sa trabaho niining bulan sa Disyembre sa tuig 2008.

 Sagad sa gipapahawa sa maong kompanya mao ang mga sub- contractual employees nga ubos sa usa ka employment agency nga mao ang Cebu General Services Inc. nga nakabase sa Maguikay, Mandaue City nga may pipila pa ka tuig nga kontrata sa Kyocera Kinseki Philippines Inc.

 Matud pa sa reklamo nga karong bulan sa Enero sa sunod tuig, gikahadlokan nga may kapin pa sa 100 ka mga contractual employees ang isunod sa pagtangtang.

 Ang nadunggan sa mga empleyado mao nga hutdon sa pagpanangtang ang mga contractual nga mga trabahante ug ipabilin lamang ang regular employees.

 Ang pasiunang rason nga gibuhian sa buhatan sa General Manager sa Kyocera Kinseki Phils. Inc., nga si Rey Semilla mao ang paghinay sa mga orders gikan sa Estados Unidos hinungdan nga gikinahanglang laslasan ang gidaghanon sa production workers.

 Gikatahong dunay gibana-banang dos mil ka mga trabahante ang maong kompanya ug ang katunga niini mga contractual employees. (Chester Abadilla)    (BANAT NEWS)