'Ex-convict' gipusil diha sa Tejero
CEBU - Talandugon ang kahimtang sa usa ka 35-anyos nga lalaki nga giingong ex-convict human pusila sa wala mailhing tawo samtang nagtan-aw og telebisyon sulod sa ilang panimalay mga alas 12 pasado niadtong Martes sa gabii diha sa Villagonzalo II barangay Tejero ning dakbayan.
Nagpaalim sa Cebu City Medical Center, giila sa kapulisan nga si Albert Montesclaros nagpuyo sa nahisgutang lugar nakaangkon og samad pinusilan sa walang bahin sa lawas nga nilapos sa tuong bahin niini.
Sa report sa dySS Super Radyo, si Montesclaros gikatahong wala makabantay dihang nalingaw sa pagtan-aw sa telebisyon dihang gikalitan sa pagpusil sa wala mailhing suspetsado nga dali kaayong nakasibat.
Gituohang atraso sa biktima ang suspetsado ang gisentro karon sa imbestigasyon sa kapulisan human matud pa dunay gikalalis diha sa ilang lugar.
Apan nakasinati og problema ang mga imbestigador pinanguluhan ni SPO1 Rogelio Nedamo sa Homicide Section tungod kay way mga silingan sa biktima ang buot nga mokooperar.
Nasayran gikan sa kapolisan nga nabilanggo na kaniadto si Montesclaros sa kasong may kalambigitan sa ilegal nga drugas.
Nagtuo ang mga imbestigador sa kapulisan nga taga diha ra ang suspek apan ang mga silingan mahadlok lang motug-an sa kahadlok nga mao unyay kontrahan. (Guam Logroño uban sa report ni Lesley Caminade,USJR MassCom Intern) (BANAT NEWS)
- Latest
- Trending
