'Boring' gidakop sa kustomer

CEBU - Usa ka babayeng giingong ‘mubo og lupad’ ang gidakop sa iyang kaugalingong kustomer human kini giingong misuway og ikyas human kawata ang kwarta sa lalaki nga midala kaniya diha sa usa ka motel sa may dalan Colon sa barangay Pari-an niadtong milabay’ng gabii.

Ang suspetsado nga gidakop sa iyang kustomer si Niña (tinuod pangalan gipugngan), 33, taga Santa Teresita, Bayoka, Agusan Sur gidala sa biktima ngadto sa Pari-an Police Station human sa pagdakop.

Ang 57-anyos nga kustomer kansang pangalan gipugngan usab residente sa Villa Leyson , sa barangay Talamban ning dakbayan.

Segun pa ni SPO4 Wilson Paglinawan nga ang biktima ug suspetsado nagkasabot nga mag-motel apan human magsawo sa lawasnong kalipay nakatagpilaw ang lalaki gisekreto og kuha sa suspek ang kwarta niini ug hinay-hinay nga miikyas.

Apan nakabantay ang lalaki ug daling migukod sa suspek ug naabtan diha sa gawas ug dihang girekisa nakuha gikan sa babaye ang P1,500 cash nga gikan sa bulsa sa lalaki.

Hinuon dihang nag-abot sa presinto mihangyo ang suspek nga pasayluon ug agi og pagtamod sa Kapaskuhan gipasaylo ra hinuon sa biktima ang babaye ug di na mopadayon pagpasaka og kaso.

Samtang sa laing bahin, usa ka Arturo Villahermosa Mindoro, nga taga dalan T. Padilla ang nabiktima sa pito ka wala mailhing mga batan-on nga mitulis kaniya ug pugsanong mikuha sa iyang P7 mil.

Ang biktima naglakaw sa McArthur Boulevard sa barangay Tinago ug naagian ang pundok sa mga batan-on, diha-diha gialirungan ang biktima ug gitiunan og kutsilyo dungan sa pagkuha sa iyang salapi.

Ang kapolisan padayon pang nanguha og dugang impormasyon kabahin sa mga suspek. (Lesley Caminade)   (BANAT NEWS)